Сэтинньи 19 күнүгэр 2-Нөөрүктээйи оскуолатыгар үгэс буолбут Корниловскай ааҕыылар ыытылыннылар. Биһиги оскуолабытыттан 12 оҕо кыттыыны ылла. Онтон 11 оҕо үлэтэ араас бириистээх миэстэҕэ тигистилэр. Үлэлэри хас да секциянан арааран көрдүлэр. Ити гынан баран, кылаастарынан араарааһын суох, алын кылаас үөрэнээччилэрэ улахан оҕолордуун тэҥҥэ күрэхтэһэллэр. Биһиги үөрүүбүтүгэр «Педагогика» секцияҕа үһус кылаас үөрэнээччитэ Алина Николаева, оттон «Кыраайы үөрэтии» секцияҕа төрдүс кылаас үөрэнээччитэ Сайаана Уйгурова бастакы миэстэлэри ыллылар. Эмиэ төрдүс кылаас үөрэнээччилэрэ Чарина, Дарина Егоровалар 2-с миэстэни ыллылар. Онон, кыра кылаастарбыт диэн иҥнэн-толлон турбакка, барытыгар көхтөөхтүк кыттан иһиэҕиҥ!

Оттон алын кылаастарга үөрэнэ сылдьан чинчийэр үлэнэн дьарыктаммыт оҕолор орто сүһүөххэ тахсан баран, салгыы дьарыктаналлара хайҕаллаах суол. Быйыл бэһис кылааска үөрэнэр Авелов Саша уонна Маркин Борис бу ааҕыыларга эмиэ ситиһиилээхтик кытыннылар. Кинилэр бастакы учууталлара Ульяна Рахимовна Петрова салалтатынан дьарыктаналлар.